زانکۆی هەڵەبجە بێ بەرامبەر فۆڕمی زانکۆ لاین بۆ دەرچووانی دوانزەی ئامادەیی پڕدەکاتەوە
بە ئامانجی خزمەتکردنی خوێندکارانی دوانزەی ئامادەیی و پێدانی ڕێنمایی پێویست تایبەت بە پڕکردنەوەی فۆڕمی زانکۆلاین؛ ئەمڕۆ یەکشەممە، ڕێکەوتی ٢٠٢٦/٩/٢٠، مەڵبەندی ڕاوێژکاریی زانکۆی هەڵەبجە دەستی بە کارەکانی کرد. لە مەڵبەندەکەدا چەندین کەسی شارەزا، پسپۆڕ و ئەکادیمی لە مامۆستایان و فەرمانبەرانی ناو زانکۆ بە شێوەیەکی دڵسۆزانە و بە ڕاوێژکردن لەگەڵ خوێندکاران، فۆڕمەکانیان بۆ پڕدەکەنەوە و زانیاری پێویستیان پێ دەبەخشن تاوەکو تووشی هیچ گیروگرفتێک نەبن.
وەک دەستپێکی کارەکانیان، پ.ی.د. ڕەنجدەر محەمەد عەزیز، یاریدەدەری سەرۆکی زانکۆ بۆ کاروباری خوێندکاران، سەردانی مەڵبەندەکەی کرد و دەستخۆشی و سوپاسی ئاڕاستەی ستافەکە کرد، وە داوای کرد تەواوی هاوکاریی خوێندکاران بکرێت لە پڕکردنەوەی فۆڕمەکانیاندا.
ئەم مەڵبەندە بۆ ماوەی ۱۰ ڕۆژ لە کاتژمێر ۹ی بەیانی تا ۱ی نیوەڕۆ لە ناو زانکۆدا فۆڕم پڕدەکاتەوە و ڕێنمایی پێویست و گرنگ دەبەخشێت. هەروەها هاوکار دەبێت لە چارەسەرکردنی هەر کێشە و گرفتێک لە پڕکردنەوەدا، وەک پێدانی وشەی تێپەڕ (Password) و ناوی بەکارهێنەر (Username) یان بەدەستهێنانەوەیان لە حالەتی ونبووندا، جێبەجێکردنی گەڕانەوە بۆ هەر قۆناغێک کە خوێندکار بیەوێت، و پێشکەشکردنی هەموو زانیاری و ڕێنماییەکی تایبەت بە خوێندنی ئێواران بەوانەی ئارەزوومەندن.
