دوو مامۆستای زانكۆی هەڵەبجە بەشداریی كۆنفرانسێكی نێودەوڵەتی لە وڵاتی ئیتاڵیا دەكەن

كۆنفرانسی کۆتایی پڕۆژەیMARE  ((Mediterranean Alliance for Research and Education)) هاوپەیمانی دەریای ناوەڕاست بۆ توێژینەوە و پەروەردە بە ناونیشانی "لەو دیوو کۆچکردنەوە: خەڵک و جووڵەی مرۆڤ لە سەرانسەری مێژووی هاوچەرخی دەریای ناوەڕاست" لە 2-3 ئاداری 2026 لە زانکۆی پاڤیا بەڕێوەچوو.

لە ماوەی دوو ڕۆژدا پێنج پانێڵی جیاواز ڕێکخران، کە توێژەرانی زانکۆکانی هەرێمی کوردستانی عێراق، مەغریب، تونس، ئیتاڵیا،  و ویلایەتە یەكگرتوەكانی ئەمریكای کۆکردەوە، بۆ گفتوگۆکردن لەسەر کۆچ، زمان، پەیوەندییە مێژووییەکان لە سەرانسەری وڵاتانی هەرێمی دەریای ناوەڕاست.

یەکێک لە دانیشتنە سەرەکییەکان پانێڵێك بوو بەناونیشانی "جینۆساید، یادەوەری و ئاشتەوایی لە هەڵەبجە"، پانێڵەكە لەلایەن پڕۆفیسۆر ئیمانوێلا مانگیارۆتی بەڕێوەبرا، لە پانێڵەکەدا دکتۆر هۆشمەن عەتا مەحمود (زانکۆی هەڵەبجە) بابەتێكی پێشکەش کرد بە ناونیشانی، " پاڵنەرە سیاسی و سەربازییەکانی ڕژێمی عێراق لەپشت کۆمەڵکوژییەکەی ساڵی ١٩٨٨ی هەڵەبجە". دواتر دکتۆر کاروان فەتاح عەبدولڕەحمان (زانکۆی هەڵەبجە)، بابەتێكی بە ناونیشانی " كۆمەڵكوژی هەڵەبجە و ڕەنگدانەوەی لە میدیای ئێرانیدا" پێشكەشكرد. پاشان پڕۆفیسۆر ئەنتۆنیۆ ئێم مۆرۆن (زانکۆی پاڤیا)، بابەتێكی پێشكەش كرد بە ناونیشانی "لە یادەوەرییەکانی ڕابردوو و ئێستای کۆمەڵکوژی هەڵەبجە و ڕۆڵی لە ئاشتەوایی مێژووییدا" پێشكەش کرد.

پانێڵەکە تیشکی خستە سەر گرنگی یادکردنەوەی کارەساتی هەڵەبجە و شیکردنەوەی بەستێنە مێژووییەکەی و پێشخستنی دیالۆگی ئەکادیمی لەسەر یادەوەری جینۆساید و ئاشتەوایی لە چوارچێوەی مێژوویی فراوانتری ڕۆژهەڵاتی ناوەڕاستدا.